partekatu
• GAZTELEKU
Gaztelekuak ateak irekiko ditu berriro, jarduera egitarau zabalarekin
Ttakun Kultur Elkarteak kudeatzen duen zerbitzu berriak gazteentzako eredu parte-hartzaile, hezitzaile eta dinamikoaren aldeko apustua egiten du.
Lasarte-Oriako Udalak Gaztelekuaren zerbitzu berria aurkeztu du gaur prentsaurrekoan. Gaztelekua udalerriko gazte eta nerabeei zuzendutako espazio bat da, aisialdi osasuntsu, hezitzaile eta parte-hartzailerako alternatiba bat eskaintzeko helburuarekin sortua.
Agerraldian parte hartu dute Agustin Valdivia Calvo alkateak, Maite Iglesias Sanchez Hezkuntza eta Gazteria zinegotziak, Xuban Ollokiegi Suberbiola eta Olatz Bardaji Olaizola zerbitzuko hezitzaileek eta Jon Pello Artetxe Mendizabal Ttakun Kultur Elkarteko koordinatzaileak (erakunde hori arduratuko da zerbitzua kudeatzeaz).
Aurkezpenean, alkateak nabarmendu du “gaurkoa oso egun berezia dela Lasarte-Oriarentzat, behingoz iragarri baitezakegu Gaztelekua berriro irekiko dela, gure gazteek eta gure gazteentzat pentsatutako gunea”, eta azpimarratu du oso garrantzitsua dela udalerria baliabidez hornitzea, gazteriari laguntzeko garapen pertsonal eta sozialean.
Gaztelekuko zerbitzu berria ingurune seguru, inklusibo eta erakargarri gisa sortu da, non gazteek aisialdiaz modu osasungarrian gozatzeko aukera izango duten. Aisialdiaz haratago, espazioa elkarbizitza, hazkunde pertsonala eta berdinen arteko harreman positiboak bultzatuko dituen topagune gisa pentsatuta dago.
Azaldu den bezala, proiektuak hezkuntza-dimentsio argia du, eta errespetua, berdintasuna, parte-hartzea, sormena eta erantzukizuna bezalako balioak sustatzen ditu. Espazio horretan, gazteek askatasunez hitz egin eta beren kezkak garatu ahal izango dituzte, konfiantzazko ingurune batean.
Zerbitzu berriaren funtsezko alderdietako bat parte-hartzea izango da. Erabiltzaileek zeregin aktiboa izango dute programazioa diseinatzerakoan, jarduerak, tailerrak eta irteerak proposatuz. Haien iritziak eta interesak etengabe hartuko dira kontuan, eta, hala, haien benetako motibazioetara egokitutako eskaintza bermatuko da.
Hezkuntza eta Gazteria zinegotziak, bere aldetik, zerbitzuarekin batera egingo den esku-hartze hezitzailea nabarmendu du, hurbiltasunean eta akonpainamendu profesionalean oinarritua. “Jakin badakigu nerabezaroa funtsezko etapa dela, eta horregatik, ondo pasatzeaz gain, entzunak, bideratuak eta lagunduak sentitzeko espazio bat eskaini nahi dugu”, adierazi du.
Maiatzeko programazioa: jarduera anitzak eta parte hartzeko irekiak
Prentsaurreko berean, maiatzerako jardueren programazioaren berri eman da, proposamen anitza, erakargarria eta gazteen interesetara egokitua eskaintzeko diseinatua. Egutegian jasotzen denez, Gaztelekuak sormen tailerrak, kirol jarduerak, proposamen ludikoak eta ekitaldi parte-hartzaileak uztartuko ditu hilabete osoan zehar.
Jardueren artean, ate irekien jardunaldiak nabarmentzen dira lehen egunetan, baita giltzatakoak, lettering-a edo zeramika bezalako tailerrak ere, karaokea, txapelketak, mahai-jokoak edo bideojokoak bezalako proposamen ludikoekin batera. Programazioak ekimen dinamikoagoak ere biltzen ditu, hala nola kirol-jarduerak (3x3, kirol arratsaldea), pintxo-lehiaketak edo erronkak, hala nola “Hi Selfie”, eta laser tag jarduera ere bai.
Hasierako programazio honek Gaztelekuak espazio bizia, etengabe bilakatzen ari dena eta gazteekin batera eraikia izateko duen nahia islatzen du. Gazteak izango dira protagonista, bai parte hartzean, bai etorkizuneko jarduerak definitzean.
Jaizkibel Plazan kokatutako Gazteleku berriak Udalak gazteria politiken alde egindako apustua indartzen du eta belaunaldi berrientzat garapen pertsonal, sozial eta komunitarioko aukerak sortzera bideratutako estrategia zabalago baten barruan sartzen da.
